Галоўная Узаемадзеянне са СМІ Навіны

Часовая павераная ў справах ЗША ў Беларусі Джэніфер Мур наведала Следчы камітэт

12.11.2019
Следчы камітэт Рэспублікі Беларусь з рабочым візітам 12 лістапада 2019 года наведала Часовая павераная ў справах ЗША ў Беларусі Джэніфер Мур.

Падчас візіту адбылася сустрэча са Старшынёй Следчага камітэта Іванам Наскевічам і яго намеснікам Сяргеем Аземшай. Бакамі абмеркаваны пытанні супрацоўніцтва Следчага камітэта з рознымі дзяржаўнымі структурамі ЗША.

Кіраўнік ведамства адзначыў, што ўзаемаадносіны паміж Рэспублікай Беларусь і Злучанымі Штатамі ў апошнія гады выбудоўваюцца ў канструктыўным ключы. У праваахоўнай сферы з дзяржаўнымі органамі ЗША знойдзены агульныя кропкі судакранання па пытаннях процідзеяння кіберзлачыннасці, незаконнаму абароту наркотыкаў, гандлю людзьмі і звязанымі з ім злачынствамі, у тым ліку злачынствамі сэксуальнага характару ў дачыненні да непаўналетніх.

Іван Наскевіч распавёў Джэніфер Мур аб запланаваных сумесна з амерыканскімі партнёрамі праектах і выказаў упэўненасць у тым, што ўзаемаадносіны паміж Беларуссю і ЗША маюць велізарны патэнцыял. Следчы камітэт гатовы і ў далейшым выбудоўваць дыялог з праваахоўнымі і іншымі дзяржаўнымі органамі ЗША, які адказвае ўзаемным інтарэсам у справе процідзеяння злачыннасці.

Часовая павераная ў справах ЗША ў Беларусі выказала ўдзячнасць Следчаму камітэту за сардэчны прыём і адзначыла важнасць наладжвання двухбаковага супрацоўніцтва.

Таксама Джэніфер Мур паведаміла, што ўражаная узроўнем узаемадзеяння Следчага камітэта з грамадскімі арганізацыямі ў сферы абароны правоў дзіцяці. У прыватнасці, дыпламатам адзначаны праект «Правядзенне сумесных мерапрыемстваў са Следчым камітэтам Рэспублікі Беларусь, накіраваных на гарманізацыю працэдуры ўдзелу дзяцей, пацярпелых ад фактаў сэксуальнага гвалту і дзіцячай парнаграфіі, у крымінальным працэсе ў дружалюбных умовах» (сумесная ініцыятыва ГА «Клуб Дзелавых Жанчын» і следчага ведамства). На думку часовай паверанай у справах ЗША ў Беларусі, рэалізацыя падобных праектаў спрыяе ўдасканаленню механізмаў абароны правоў дзіцяці, аказання непаўналетнім ахвярам злачынстваў псіхалагічнай і іншай неабходнай дапамогі.