Старшыня Следчага камітэта Іван Наскевіч прыняў удзел ва ўрачыстай лінейцы на малой радзіме

Галоўная

Узаемадзеянне са СМІ

Навіны

Старшыня Следчага камітэта Іван Наскевіч прыняў удзел ва ўрачыстай лінейцы на малой радзіме

02.09.2019

Старшыня Следчага камітэта Беларусі прыняў удзел у святочнай лінейцы, прысвечанай Дню ведаў, у Церабяжоўскай сярэдняй школе ў Столінскім раёне Брэсцкай вобласці.

З пачаткам новага навучальнага года школьнікаў і педагогаў павіншавалі і іншыя ганаровыя госці: старшыня Столінскага райвыканкама, кіраўнік ААТ «Церабяжоў-Агра», прадстаўнікі праваахоўных органаў, мясцовых прадпрыемстваў і арганізацый.

Іван Наскевіч звярнуўся да дзяцей з прывітальным словам, пажадаў поспехаў у вучобе, парэкамендаваў правесці школьныя гады з максімальнай карысцю. Ён адзначыў, што яму прыемна пабываць у такі значны дзень на малой радзіме і бачыць маладое пакаленне.

– Вельмі прыемна ў гэты дзень бачыць разумныя і светлыя твары першакласнікаў, якія з натхненнем чакаюць свайго першага ўрока. Для іх гэта штосьці новае і, напэўна, кожнаму з прысутных дарослых хацелася б таксама вярнуцца на шмат гадоў таму і апынуцца тут – адзначыў Іван Наскевіч.

Старшыня Следчага камітэта падзякаваў настаўнікам за іх няпростую працу, пажадаўшы ім цярпення і ініцыятыўнасці ў рабоце з дзецьмі.

– У нашай краіне пытанням адукацыі, стварэнню ўмоў для ўсебаковага развіцця дзяцей надаецца павышаная ўвага. Навучэнцы сельскіх школ па ўзроўні ведаў, дасягненняў у спорце і творчасці нічым не саступаюць аднагодкам з гарадскіх. У першую чаргу, гэта заслуга педагагічнага калектыву, – падкрэсліў Іван Наскевіч.

У падарунак для школы ён уручыў дырэктару спартыўны інвентар і экіпіроўку, што дазволіць больш якасна праводзіць заняткі па фізічнай культуры і прывіваць дзецям цягу да здаровага ладу жыцця.

Традыцыйна самым яркім момантам Дня ведаў стаў першы званок. Старшыня Следчага камітэта ўручыў кожнаму першакласніку кнігу "Беларусь - наша Радзіма" - падарунак Прэзідэнта першакласніку.

Іван Наскевіч таксама далучыўся да школьнікаў і разам з імі ў класе паўдзельнічаў у першым ўроку, тэмай якога стаў радок з верша Янкі Купалы "Маладая Беларусь" - "Занімай, Беларусь маладая мая, свой пачэсны пасад між народамі!".

Афіцыйны прадстаўнік УСК па Брэсцкай вобласці

Дзмітрый Іванюк