У Гомелі 17 мая праходзіць трэцяе сумеснае паседжанне калегій следчых камітэтаў Рэспублікі Арменія, Рэспублікі Беларусь і Расійскай Федэрацыі.

У ім бяруць удзел старшыні следчых ведамстваў трох краін - Агван Аўсяпян, Іван Наскевіч і Аляксандр Бастрыкін.

У ліку запрошаных таксама Генеральны пракурор Рэспублікі Беларусь Аляксандр Канюк, старшыня Гомельскага аблвыканкама Уладзімір Дворнік і памочнік Прэзідэнта Рэспублікі Беларусь Юрый Шулейка.

На мерапрыемстве плануецца абмеркаваць аптымізацыю крымінальнага працэсу і працы следчых органаў, а таксама практыку непасрэднага ўзаемадзеяння тэрытарыяльных следчых падраздзяленняў Расійскай Федэрацыі і Рэспублікі Беларусь у рамках Канвенцыі аб прававой дапамозе і прававых адносінах па грамадзянскіх, сямейных і крымінальных справах ад 22 студзеня 1993 г. з улікам унесеных у заканадаўства змяненняў.

У Следчым камітэце Беларусі перакананыя, што вопыт трох краін па ўкараненні інфармацыйных тэхналогій у крымінальны працэс дазволіць правесці канструктыўны дыялог і зрабіць чарговы крок на шляху да аптымізацыі часовых і матэрыяльных выдаткаў у працы.

У заключэнне паседжання плануецца падпісанне шэрагу выніковых дакументаў, закліканых павысіць эфектыўнасць супрацоўніцтва, у тым ліку ў галіне крыміналістычнага забеспячэння папярэдняга расследавання.