Па даручэнні Прэзідэнта Беларусі Аляксандра Лукашэнкі дзяржаўны сакратар Савета бяспекі Станіслаў Зась прадставіў сёння калектыву Следчага камітэта новага кіраўніка ведамства - Івана Наскевіча, перадае карэспандэнт БЕЛТА. 

Дзяржсакратар Савета бяспекі падкрэсліў, што Іван Наскевіч ведае следчую работу не па чутках. На працягу дванаццаці гадоў ён паслядоўна займаў пасады ад следчага раённай пракуратуры да старшага следчага па важнейшых справах пракуратуры вобласці. У 2007 годзе Іван Наскевіч назначаны на пасаду пракурора Пінскага раёна, з 2012 года займаў пасаду пракурора Брэсцкай вобласці. 

"Разам са значнымі поспехамі ў дзейнасці Следчага камітэта ёсць нявырашаныя праблемы. У сувязі з гэтым, у адпаведнасці з устаноўкамі Прэзідэнта Беларусі, ведамству пастаўлены шэраг важных задач. У прыватнасці, звернута ўвага на неабходнасць павышэння эфектыўнасці ўзаемадзеяння следчых падраздзяленняў з органамі дазнання пры ўзбуджэнні крымінальных спраў і іх расследаванні. Недапушчальны адрыў папярэдняга следства ад аператыўна-вышуковых напрацовак. Следчы не павінен па фармальных прычынах вяртаць органам дазнання матэрыялы даследчых праверак", - звярнуў увагу Станіслаў Зась. 

Органы дазнання, у сваю чаргу, не павінны спрабаваць перадаць следству для прыняцця працэсуальных рашэнняў не правераную належным чынам інфармацыю. Хаджэнне матэрыялаў па крузе павінна быць выкаранена. 

Сярод прыярытэтных задач для Следчага камітэта - аптымізацыя ведамства (ад цэнтральнага апарату да раённага аддзела), паслядоўная і сістэмная работа з кадрамі, з акцэнтам на падрыхтоўцы маладых спецыялістаў, укараненне сучасных тэхналогій апрацоўкі дакументаў, стварэнне ўласнай адзінай аўтаматызаванай сістэмы. 

Як паведамлялася, Іван Наскевіч назначаны на пасаду старшыні Следчага камітэта Беларусі ўказам ад 10 лістапада 2015 года нумар 456.

Арыгінал матэрыялу: http://blr.belta.by/society/view/novy-starshynja-sledchaga-kamiteta-ivan-naskevich-pradstauleny-kalektyvu-vedamstva-40288-2015/