Следчы камітэт працягвае работу на месцы здарэння ў Магілёве, дзе на ААТ «Магілёўдрэў» адбыўся выбух.

Па папярэднім дадзеным, вечарам 25 верасня каля 18 гадзін 30 хвілін у лакафарбавым цэху прадпрыемства адбылося ўзгаранне з адначасовым выбухам, у выніку якога пашкоджаны канструкцыі і абсталяванне цэха. Супрацоўнікамі МНС пажар ліквідаваны.

На момант выбуху ў вытворчым памяшканні знаходзілася дзевяць работнікаў. Шэсць людзей – тры жанчыны і трое мужчын – з цялеснымі пашкоджаннямі рознай ступені цяжару шпіталізаваны ва ўстановы аховы здароўя.

Па дадзеным факце ўзбуджана крымінальная справа па прыкметах складу злачынства, прадугледжанага ч. 2 арт. 302 (парушэнне правіл вытворча-тэхнічнай дысцыпліны і правіл бяспекі, якія выклікалі выбух і прычыненне цяжкіх цялесных пашкоджанняў работнікам прадпрыемства) Крымінальнага кодэкса Рэспублікі Беларусь. 

Старшыня Следчага камітэта Іван Наскевіч раніцай 26 верасня прыбыў у Магілёў і правёў аператыўную нараду са следчай групай, створанай для расследавання крымінальнай справы. Кіраўнік ведамства азнаёміўся з вынікамі першапачатковых следчых дзеянняў, даў шэраг указанняў у рамках каардынацыі далейшых дзеянняў структур, якія зараз узаемадзейнічаюць, а таксама паставіў ход расследавання на асабісты кантроль. Таксама абмеркаваны меры, неабходныя для бесперабойнага функцыянавання прадпрыемства і недапушчэння падобных здарэнняў у будучыні. 

На нарадзе, акрамя кіраўніцтва абласнога упраўлення Следчага камітэта, таксама прысутнічалі кіраўнікі тэрытарыяльных падраздзяленняў МНС, ДКСЭ, УУС, Міністэрства працы, а таксама службовыя асобы прадпрыемства.

Следчымі пачаты паўторны агляд месца здарэння. У цяперашні час забраны шжраг аб'ектаў з мэтай далейшага іх даследавання спецыялістамі Дзяржаўнага камітэта судовых экспертыз. Таксама дададзена да матэрыялаў крымінальнай справы дакументацыя прадпрыемства, у тым ліку тая, якая рэгламентуе тэхніку бяспекі на вытворчасці. Працягваюцца допыты сведак, у тым ліку службовых асоб ААТ «Магілёўдрэў».

Аддзел інфармацыі і сувязі з грамадскасцю