У зводках усё часцей з'яўляецца інфармацыя аб фактах махлярства, якія ўчыняюцца пад выглядам продажу тавараў у інтэрнэце. За некалькі тыдняў жыхары Фрунзенскага раёна сталіцы перадалі кібермахлярам больш за Br11 тыс.

Так, 19-гадовая дзяўчына знайшла аб'яву аб продажы мабільнага тэлефона Iphone. Прапанова паказалася выгаднай і яна звязалася з прадаўцом, які адправіў рэквізіты банкаўскай карткі для аплаты пакупкі. Дзяўчына перавяла на названую картку без малога Br1,6 тыс., пасля чаго прадавец стаў ігнараваць яе, а тэлефон так і не прыйшоў. З такімі махлярамі сутыкнуліся яшчэ 11 мінчан, якія спрабавалі купіць мабільныя тэлефоны і адзенне.

Па ўсіх фактах Фрунзенскім (Мінска) раённым аддзелам Следчага камітэта ўзбуджаны крымінальныя справы па ч. 1 арт. 209 (махлярства) КК. Следчыя ва ўзаемадзеянні з супрацоўнікамі міліцыі ўстанаўліваюць уладальнікаў інтэрнэт-магазінаў.

У сувязі з усё больш частымі выпадкамі махлярства ў інтэрнэце ў Следчым камітэце рэкамендуюць ажыццяўляць пакупкі толькі ў правераных прадаўцоў. Пры выбары магазіна неабходна звяртаць увагу на наяўнасць водзываў аб таварах і адсутнасць кантактнай інфармацыі. Як правіла, прапануемы махлярамі асартымент па кошце ніжэйшы за аналагічныя прапановы ў інтэрнэце.

Крыніца: БелТА.