Галоўным следчым упраўленнем завершана расследаванне крымінальнай справы ў дачыненні да былога дырэктара праектна-пошукавага рэспубліканскага ўнітарнага прадпрыемства «Інстытут «Белчыгунпраект», які ўчыніў шэраг злачынстваў карупцыйнай накіраванасці.

Следствам вызначана, што абвінавачваны ў 2012-2014 гадах, выкарыстоўваючы свае службовыя паўнамоцтвы, неаднаразова даваў падначаленым яму супрацоўнікам указанні аб заключэнні яўна нявыгадных кантрактаў з камерцыйнымі структурамі, што пацягнула прычыненне ўрону дзяржаўнаму прадпрыемству на суму болей за 9 мільярдаў рублёў.

За выкананне прызначаных дзеянняў, якія выказаліся ў заступніцтве і спрыяльным рашэнні пытанняў, службовая асоба патрабавала і пасля атрымала ад кіраўнікоў дадзеных структур незаконныя грашовыя ўзнагароджанні на агульную суму больш за 160 тысяч долараў ЗША.

У ходзе папярэдняга расследавання дапытаны сотні сведак, праведзены дзесяткі найскладанейшых экспертыз. Праведзена праверка гаспадарчай дзейнасці РУП «Інстытут «Белчыгунпраект».

У ходзе следства забяспечана пакрыццё ўрону шляхам накладання арышту на маёмасць абвінавачванага на агульную суму болей за 19 мільярдаў рублёў. 

На падставе сабраных доказаў былому дырэктару прадпрыемства следствам прад'яўлена канчатковае абвінавачанне па ч.3 арт.424 (злоўжыванне службовымі паўнамоцтвамі, якое выклікала цяжкія наступствы ў выглядзе прычынення ўрону ў адмыслова буйным памеры) і ч.3 арт.430 (атрыманне хабару ў буйным памеры) Крымінальнага кодэкса Рэспублікі Беларусь.

Крымінальная справа перададзена пракурору для накiравання ў суд.