Следчы камiтэт
Расследаванне крымінальнай справы аб ДТЗ на праспекце Пераможцаў у Мінску, у якім загінула дзіця, завершана
20.03.2018
Галоўным следчым упраўленнем Следчага камітэта завершана расследаванне крымінальнай справы ў дачыненні да вадзіцеля, які ўчыніў наезд на групу пешаходаў на рэгуляваным пераходзе каля сталічнага ГЦ "Замак".
Як раней перадавалася, 55-гадовы вадзіцель грузавога аўтамабіля ЗІЛ-5301, рухаючыся 2 снежня 2017 года па праспекце Пераможцаў з боку вуліцы Сапёраў, каля 17.00 зрабіў наезд на групу пешаходаў, якія перасякалі праезную частку, на дазваляльны сігнал святлафора.
У выніку аварыі дзяўчынка, 2006 года нараджэння, памерла на месцы здарэння. Яе бабулі, 1961 года нараджэння, брату, 2010 года нараджэння, і яшчэ двум пешаходам прычынены розныя цялесныя пашкоджанні.
Для ўстанаўлення абставін здарэння была створана следчая група, якой былі праведзены агляды, у тым ліку месца здарэння, допыты, вочныя стаўкі і комплекс іншых працэсуальных дзеянняў. Забраны і вывучаны запісы камер відэаназірання, якія дададзены да матэрыялаў крымінальнай справы.
Па наяўнай у распараджэнні следства інфармацыі, тэхагляд дадзенага аўтамабіля не праводзіўся з 2015 года, а ў жніўні 2017 года абвінавачваны прыцягваўся да адміністрацыйнай адказнасці за кіраванне транспартным сродкам, які не прайшоў дзяржтэхагляд.
Асноўны акцэнт пры расследаванні крымінальнай справы быў зроблены на ўстанаўленні тэхнічнага стану ЗІЛ-5301. Для гэтага следчым пасля дэталёвага агляду аўтамабіля была прызначана камісійная аўтатэхнічная экспертыза, згодна вывадам якой атрыманы дадзеныя, што тармазная сістэма, рулявое кіраванне і хадавая частка грузавіка былі няспраўныя. У тым ліку на адным з колаў у працэсе эксплуатацыі аўтамабіля была поўнасцю зношана тармазная накладка. Дадзены транспартны сродак не мог быць дапушчаны да ўдзелу ў дарожным руху.
Таксама следствам вызначана, што вадзіцель бачыў забараняльны сігнал святлафора і меў магчымасць спыніць аўтамабіль перад стоп-лініяй толькі пры ўмове спраўнасці тармазоў. Акрамя таго, у вадзіцеля была магчымасць адвесці транспартны сродак ад пешаходнага перахода, выехаўшы на газон або агароджванне, што дапамагло б прадухіліць трагедыю.
Па выніках расследавання гэтай крымінальнай справы Следчым камітэтам накіраваны інфармацыйныя лісты ў Міністэрства транспарту і камунікацый і Мінгарвыканкам. У іх падрабязна апісаны прычыны гэтага здарэння і прапанаваны меры па прадухіленні падобнага ў далейшым.
Дзеянні абвінавачванага кваліфікаваны следствам па ч.2 арт.317 Крымінальнага кодэкса Рэспублікі Беларусь (парушэнне правіл дарожнага руху і эксплуатацыі транспартных сродкаў асобай, якая кіруе транспартным сродкам, якое выклікала па неасцярожнасці смерць чалавека і прычыненне менш цяжкага цялеснага пашкоджання другому чалавеку). Абвінавачваны поўнасцю прызнаў сваю віну і раскаяўся ва ўчыненым.
Крымінальная справа перададзена пракурору для напрамку ў суд. Мера стрымання ў дачыненні да вадзіцеля грузавіка ў выглядзе заключэння пад варту не мянялася.
Следчы камітэт нагадвае, што рэгулярны дзяржаўны тэхнічны агляд транспартнага сродку - гэта гарантыя яго спраўнасці і своечасовай дыягностыкі магчымых паломак, ваша асабістая бяспека, жыццё і здароўе блізкіх і атачальных. Стаўцеся да гэтага адказна.
Аддзел інфармацыі і сувязі з грамадскасцю
Устанавіць ісціну – справа гонару
12.09.2025
