Следчы камiтэт
Следчым камітэтам завершана расследаванне крымінальнай справы аб кардынгу
13.06.2018
Галоўным следчым упраўленнем Следчага камітэта завершана расследаванне крымінальнай справы аб крадзяжы грашовых сродкаў з банкаўскіх карт замежных грамадзян у асабліва буйным памеры.
Следчымі была атрымана інфармацыя аб дачыненні трох мінчан да супрацьпраўных дзеянняў, а менавіта аб неправамерным завалоданні рэквізітамі чужых банкаўскіх плацёжных карт і наступным іх выкарыстанні ў карыслівых мэтах. У выніку аператыўна-вышуковых мерапрыемстваў, праведзеных супрацоўнікамі падраздзяленняў па раскрыцці злачынстваў у сферы высокіх тэхналогій ГУУС Мінгарвыканкама і УУС Магілёўскага аблвыканкама, фігуранты былі затрыманыя.
Устаноўлена, што 39-гадовы мінчанін арганізаваў групу, у склад якой таксама ўваходзілі 40-гадовы і 35-гадовы жыхары сталіцы, і іншыя неўстаноўленыя асобы. У перыяд з сакавіка 2009 года па снежань 2016 года ўдзельнікі групы з выкарыстаннем кампутарнай тэхнікі, рэквізітаў чужых банкаўскіх плацёжных картак і інтэрнэт-рэсурсаў, здзейснілі крадзеж грашовых сродкаў з карт-рахункаў на агульную суму, якая перавышае 400 тысяч долараў ЗША.
Па дадзеных следства, у інтэрнэт-крамы, зарэгістраваныя пераважна на тэрыторыі краін Заходняй Еўропы і Злучаных Штатаў Амерыкі, падаваліся рэквізіты чужых банкаўскіх карт у якасці сродку плацяжу за тавар або паслугу. Тавары накіроўваліся ў адрас падстаўных асоб, якія, будучы ўведзенымі ў зман удзельнікамі арганізаванай групы, ажыццяўлялі яго рэалізацыю. Атрыманыя грашовыя сродкі накіроўваліся на рахункі ў банках і аплатных сістэмах, якія былі падкантрольныя абвінавачаным. У наступным грошы пераводзілі ў наяўныя на тэрыторыі Рэспублікі Беларусь і размяркоўвалі іх паміж удзельнікамі арганізаванай групы.
Варта адзначыць, што падобная супрацьпраўная дзейнасць не была адзіным заняткам і крыніцай прыбытку абвінавачаных. Напрыклад, 39-гадовы і 40-гадовы мужчыны да моманту затрымання займалі кіруючыя пасады ў арганізацыі, якая ажыццяўляе дзейнасць у сферы інфармацыйных тэхналогій.
У ходзе следства накладзены арышт на маёмасць абвінавачаных: 7 кватэр і 3 аўтамабілі агульным коштам 990 тысяч рублёў, грашовыя сродкі ў памеры больш за 58 тысяч рублёў.
Дзеянні ўдзельнікаў арганізаванай групы кваліфікаваныя следствам па ч. 4 арт. 212 (крадзеж шляхам выкарыстання кампутарнай тэхнікі) Крымінальнага кодэкса Рэспублікі Беларусь. Да іх прыменена мера стрымання ў выглядзе заключэння пад варту.
Матэрыялы ў дачыненні да неўстаноўленых удзельнікаў арганізаванай групы выдзелены ў асобную вытворчасць.
Крымінальная справа перададзена пракурору для накіравання ў суд.
Аддзел інфармацыі і сувязі з грамадскасцю
Устанавіць ісціну – справа гонару
12.09.2025
