Смяротнае траўміраванне на тэрыторыі сталічнага прадпрыемства: расследаванне завершана

Галоўная

Узаемадзеянне са СМІ

Навіны

Смяротнае траўміраванне на тэрыторыі сталічнага прадпрыемства: расследаванне завершана

22.07.2020

Галоўным следчым упраўленнем Следчага камітэта завершана расследаванне крымінальнай справы аб парушэнні праектаў пры вытворчасці будаўніча-мантажных работ, што пацягнула гібель двух чалавек.

Па дадзеных следства, 12 лютага 2019 года а 9 гадзіне раніцы пры вытворчасці дэмантажных работ на тэрыторыі аднаго з прадпрыемстваў г. Мінска адбылося абвальванне цаглянай часткі будынка на двух супрацоўнікаў. У выніку абвальвання 63-гадовы вядучы інжынер складской гаспадаркі загінуў на месцы здарэння, а 53-гадовы кантралёр тэхнічнага стану механічных транспартных сродкаў памёр пры дастаўленні ва ўстанову аховы здароўя.

Следчымі сумесна з супрацоўнікамі ДКСЭ, Дэпартамента кантролю і нагляду за будаўніцтвам Дзяржаўнага камітэта па стандартызацыі Рэспублікі Беларусь і Дэпартамента дзяржаўнай інспекцыі працы праведзены агляд месца здарэння.

Праведзеным расследаваннем устаноўлена, што будаўнічая аварыя адбылася па прычыне дапушчэння шматлікіх грубых парушэнняў праекта вытворчасці работ на аб'екце і тэхнічных нарматыўных прававых актаў. Адказным за арганізацыю правядзення будаўніча-мантажных работ і выканання патрабаванняў бяспекі з'яўляўся 30-гадовы намеснік галоўнага інжынера, на якога былі ўскладзеныя абавязкі па арганізацыі выканання работ.

Згодна з матэрыяламі крымінальнай справы, намеснік галоўнага інжынера ў парушэнне нарматыўных прававых актаў і службовай інструкцыі:

- не азнаёміў з праектам выканання работ машыніста экскаватара, які ажыццяўляў ударнае ўздзеянне абсталяваннем экскаватара насуперак прызначэнню інструкцыі вытворцы;

- не прысутнічаў на месцы работ для ажыццяўлення кантролю;

- не забяспечыў належную агароджу тэрыторыі, якая стварала б бяспечныя ўмовы выканання работ.

Названыя абставіны ў сваёй сукупнасці сталі прычынай будаўнічай аварыі, якая прывяла да смяротнага траўміравання.

У рамках расследавання дапытаныя больш за 40 супрацоўнікаў прадпрыемства і асоб, звязаных з выкананнем работ; вывучаныя запісы камер відэаназірання; прааналізавана дакументацыя прадпрыемства, якая рэгламентуе парадак будаўніцтва аб'екта, вытворчасці работ, а таксама забеспячэння бяспечных умоў і аховы працы на прадпрыемстве.

Таксама да матэрыялаў крымінальнай справы далучана і прааналізавана заключэнне будаўніча-тэхнічнай экспертызы, праведзенай супрацоўнікамі ДКСЭ з прыцягненнем спецыялістаў Беларускага нацыянальнага тэхнічнага універсітэта, Дэпартамента кантролю і нагляду за будаўніцтвам Дзяржаўнага камітэта па стандартызацыі і Дэпартамента дзяржаўнай інспекцыі працы.

Па выніках расследавання намесніку галоўнага інжынера падраднай арганізацыі прад'яўленае абвінавачанне па ч. 2 арт. 305 Крымінальнага кодэкса Рэспублікі Беларусь (парушэнне праектаў, абавязковых для выканання патрабаванняў тэхнічных нарматыўных прававых актаў пры вытворчасці будаўніча-мантажных работ асобай, адказнай за іх выкананне, што пацягнула па неасцярожнасці смерць дзвюх асоб). Віну ў здзейсненым злачынстве мужчына прызнаў цалкам. Да яго ўжытая мера стрымання ў выглядзе падпіскі аб нявыездзе і належных паводзінах.

Расследаванне завершана. Крымінальная справа перададзена пракурору для накіравання ў суд.

Аддзел інфармацыі і сувязі з грамадскасцю