Следчы камiтэт
У Мінску падпісаны Мемарандум аб супрацоўніцтве з Агенцтвам па барацьбе з наркотыкамі Міністэрства юстыцыі ЗША
21.05.2019
У Міністэрстве замежных спраў Рэспублікі Беларусь 21 мая 2019 года адбылася цырымонія падпісання Мемарандума аб супрацоўніцтве паміж Следчым камітэтам Рэспублікі Беларусь і Агенцтвам па барацьбе з наркотыкамі Міністэрства юстыцыі ЗША.
З беларускага боку подпіс пад дакументам паставіў першы намеснік Старшыні Следчага камітэта Аляксей Волкаў. Ад імя Агенцтва па барацьбе з наркотыкамі мемарандум падпісаў рэгіянальны дырэктар Уільям Уорэн-малодшы.
На цырымоніі падпісання таксама прысутнічалі намеснік Міністра замежных спраў Рэспублікі Беларусь Яўген Шастакоў, Часовы павераны ў справах ЗША ў Рэспубліцы Беларусь Джэніфер Мур, прадстаўнікі зацікаўленых беларускіх дзяржаўных органаў, амерыканскага пасольства, прадстаўніцтва Агенцтва па барацьбе з наркотыкамі ў г.Маскве, сродкаў масавай інфармацыі.
Трэба адзначыць, што ўзаемадзеянне Следчага камітэта з Агенцтвам па барацьбе з наркотыкамі носіць канструктыўны характар і нацэлена на дасягненне практычных вынікаў.
Раней у Следчым камітэце праведзены рабочыя сустрэчы з кіраўніцтвам прадстаўніцтва Агенцтва ў г.Маскве, на якіх абмяркоўваліся перспектыўныя напрамкі супрацоўніцтва па антынаркатычнай тэматыцы, магчымасць удзелу беларускіх следчых у розных мерапрыемствах, якія праводзяцца пры падтрымцы Агенцтва.
У развіццё дасягнутых дамоўленасцей супрацоўнікі Следчага камітэта ў 2018 і 2019 гадах прынялі ўдзел у семінарах па пазначанай праблематыцы, арганізаваных Агенцтвам у Расійскай Федэрацыі, а таксама Міжнароднай канферэнцыі праваахоўных органаў па барацьбе з незаконным абаротам наркотыкаў, якая адбылася ў г.Баку.
У падпісаным мемарандуме бакі замацавалі ўзаемнае імкненне да далейшага развіцця супрацоўніцтва па такіх напрамках, як абмен вопытам работы і рознай інфармацыяй, узаемнае інфармаванне аб змяненнях нацыянальнага заканадаўства і следчай практыцы, арганізацыя рабочых сустрэч і кансультацый па актуальных пытаннях, правядзенне розных сумесных мерапрыемстваў, накіраваных на павышэнне прафесійнага ўзроўню следчых.
Падпісанне дадзенага дакумента будзе дапамагаць пашырэнню кантактаў з амерыканскім бокам у барацьбе з незаконным абаротам наркотыкаў, умацаванню дзелавых сувязей з праваахоўнымі структурамі ЗША.
Міжнародна-прававы аддзел
Следчага камітэта
Рэспублікі Беларусь
Устанавіць ісціну – справа гонару
12.09.2025
